pas-e-parda tujhe har bazm men shamil samajhte hain
koi mahfil ho ham us ko tiri mahfil samajhte hain
baḌe hoshiyar hain vo jin ko sab ghafil samajhte hain
nazar pahchante hain vo mizaj-e-dil samajhte hain
vo ḳhud kamil hain mujh naqis ko jo kamil samajhte hain
vo husn-e-zan se apna hi sa mera dil samajhte hain
samajhta hai gunah rindi ko tu ai zahid-e-ḳhud-bin
aur aise zohd ko ham kufr men daḳhil samajhte hain
samajhta hai ghalat laila ko laila qais divana
nazar vaale to laila ko bhi ik mahmil samajhte hain
saḌi divana sauda.i jo chahe so kahe duniya
haqiqat-bin magar ‘majzub’ ko aaqil samajhte hain
Leave a Reply