Shahida Lateef
nazar pukar rahi hai tumhi chale aao
miri hayat miri zindagi chale aao
ye suuna suuna sa angan pukarta hai tumhen
bahut ghaneri hai ye tirgi chale aao
ghurur-e-zulmat-e-shab tum hi toḌ sakte ho
banun charagh ki tum raushni chale aao
ye honT suukh na jaa.en tumhen sada de kar
bichhaḌ na jaa.e kahin har ḳhushi chale aao
in ashnaon men na-ashna hain log tamam
kahan chhupe ho mire ajnabi chale aao
tumhara saath nibha.egi ‘shahida’ har-dam
karoge tum hi miri rahbari chale aao
Leave a Reply