Kya Nazara Tha Meri Aankhon Mein

kyā nazāra thā merī āñkhoñ meñ

jab vo saarā thā merī āñkhoñ meñ

ek tūfān thā kahīñ barpā

aur dhārā thā merī āñkhoñ meñ

haal kaisā ye tū ne kar Daalā

kitnā pyārā thā merī āñkhoñ meñ

kuchh bhī dekhā nahīñ thā maiñ ne jab

har nazāra thā merī āñkhoñ meñ

chāñd jab tak nazar na aayā thā

taarā taarā thā merī āñkhoñ meñ

jab kiyā ishq kā safar āġhāz

kab kināra thā merī āñkhoñ meñ

kitnī āñkhoñ se ‘shāz’ bachte hue

koī haarā thā merī āñkhoñ meñ

Leave a Comment