ab tak jo ji chuka huun janam gin raha huun main
duniya samajh rahi hai ki gham gin raha huun main
matruk raste men laga sang-e-mil huun
bhaTke hue ke sidhe qadam gin raha huun main
Table se gir ke raat ko TuuTa hai ik gilas
batti jala ke apni raqam gin raha huun main
ta.adad janna hai ki kitne mare hain aaj
jo chal nahin sake hain vo bam gin raha huun main
main santari huun auraton ki jail ka huzur
do-char qaidi is liye kam gin raha huun main
‘arish’ surahi-dar si gardan ke sehr men
zamzam si guftugu ko bhi ram gin raha huun main
Leave a Reply