ali-sardar-jafri

Yaad Aae Hain Ahd-E-Junun Ke Khoe Hue Dildar Bahut

yaad aae hain ahd-e-junun ke khoe hue dildar bahut

un se duur basai basti jin se hamen tha pyaar bahut

ek ik kar ke khili thiin kaliyan ek ik kar ke phuul gae

ek ik kar ke ham se bichhde bagh-e-jahan men yaar bahut

husn ke jalve aam hain lekin zauq-e-nazara aam nahin

ishq bahut mushkil hai lekin ishq ke daavedar bahut

zakhm kaho ya khilti kaliyan haath magar guldasta hai

bagh-e-vafa se ham ne chune hain phuul bahut aur khaar bahut

jo bhi mila hai le aae hain dagh-e-dil ya dagh-e-jigar

vaadi vaadi manzil manzil bhatke hain ‘sardar’ bahut

More Poems

Leave a Comment