aaj shab-e-me.araj hogi is liye taz.in hai
vo qadam uTThe hain jin ko asman qalin hai
maan ne paḌh kar phunk di thi mujh pe bachpan men kabhi
mere dil par naqsh ab tak sura-e-yasin hai
ashk ke bose ki lazzat kya bata.un main tumhen
kya bata.un main tumhen ye kis qadar namkin hai
us ko darveshi samajhne valon par hairan huun
haath men kaasa uThana ishq men tauhin hai
ilm ki ḳhvahish tumhen manzil talak le ja.egi
jaane vaale to bano agle qadam par chiin he
aur bhi yaron se kahna vaqt pe sab aa milen
mere ghar ke sahn men ik ḳhvab ki tadfin hai
sochna is baab men bekar ja.ega tira
ye mohabbat hai miyan us ka alag aa.iin hai
us ke lab par ik dua hai sirf meri maut ki
mere lab par kuchh nahin kuchh bhi nahin amin hai
ab mohabbat ki taraf main lauTne vaala nahin
dil ye tu ne Thiik samjha aisa hi kuchh scene hai
uḌ raha hai ‘zeb’ ki tahrir ke ahang men
ye parinda hazrat-e-iqbal ka shahin hai
Leave a Reply