har manzil men har raste men sach apne kaam aaya hai
ham ne jhuTe logon ko aksar ghar tak pahunchaya hai
va.ada-shikan vo laakh sahi par mujh ko hairan karne ko
kabhi kabhi to mujh se milne va.ade par bhi aaya hai
chashm-e-tamasha bhi sharminda hairat men a.ine bhi
vaqt ki dhuup ne kaisa kaisa chehron ko jhulsaya hai
vo jo diya raushan hi nahin hai us ke liye rahmat kaisi
kyuun ye tez hava ka jhonka ghar men mire dar aaya hai
ham bhi ab se ba-qaul-e-‘hali’ duniya ko jhuTlaenge
aaj talak is duniya ne ham sachchon ko jhuThlaya hai
kis ḳhamoshi se palTi hai ‘ḳhavar’ vo mauj-e-dariya
jis mauj-e-dariya ne mujh ko sahil par pahunchaya hai
Leave a Reply