Nafas Ambalvi
kaun si shaḳh ka patta tha hara bhuul gaya
peḌ se TuuT ke main apna pata bhuul gaya
main koi va.ada-faramosh nahin huun phir bhi
mujh pe ilzam hai main apna kaha bhuul gaya
apne bachchon ke khilaune to use yaad rahe
ghar men bimar paḌi maan ki dava bhuul gaya
kar to diin main ne charaghon ki qataren raushan
hai zamane ki magar tez hava bhuul gaya
ḳhauf-e-dozaḳh se Darata raha vaa.iz mujh ko
aur ḳhud apne gunahon ki saza bhuul gaya
tujh se kuchh kaam tha lekin tire ghar ke aage
ab khaḌa soch raha huun ki main kya bhuul gaya
be-ḳhudi had se jo guzri to main ik roz ‘nafas’
ghar se kya nikla ki phir ghar pata ka bhuul gaya
Leave a Reply