zinda rahne ki talab is liye pyari na rahi
koi vaq.at dil-e-qatil men hamari na rahi
mai-kashi chhoḌ di is vaste ham ne saaqi
pahle jaisi tiri ankhon men ḳhumari na rahi
niind ka zahar nigahon men samaya jab se
ratjagon se miri ba-zabta yaari na rahi
aḳhirash aa hi gaya kushta-e-hasrat ko qarar
umr-bhar lazzat-e-avargi taari na rahi
sikhta kis tarah a.in-e-junun ke adab
mujh pe maa.il ba-karam diid tumhari na rahi
shiddat-e-zabt se pathra ga.iin ankhen bhi ‘nadim’
gham raha saath men par girya-o-zari na rahi
Leave a Reply