hava har ik samt bah rahi hai
jilau men kuche makan le kar
safar ke be-ant paniyon ki thakan le kar
jo aankh ke ijz se pare hain
unhi zamanon ka gyaan le kar
tire ilaqe ki sarhadon ke nishan le kar
hava har ik samt bah rahi hai
zamin chup
asman vusat men kho gaya hai
faza sitaron ki fasl se lahlha rahi hai
makan makinon ki ahaton se dhadak rahe hain
jhuke jhuke nam-zada darichon men
aankh koi ruki hui hai
fasil-e-shahr-e-murad par
na-murad aahat atak gai hai
ye khaak teri miri sada ke dayar men
phir bhatak gai hai
dayar sham-o-sahar ke andar
nigar-e-dasht-o-shajar ke andar
savad-e-jan-o-nazar ke andar
khamoshi bahr-o-bar ke andar
rida-e-sub.h-e-khabar ke andar
aziyyat roz-o-shab men
hone ki zillaton men nidhal sub.hon ki
os men bhigti thithurti
khamoshiyon ke bhanvar ke andar
dilon se bahar
dilon ke andar
hava har ik samt bah rahi hai
Leave a Reply