ajiib rang liye aaj milne aaya vo
zara si der men lagne laga paraya vo
vahi gali hai vahi shaam hai vahi vahshat
par us dariche men chehra na jhilmilaya vo
na jaane bhiig rahi hain abhi se kyuun ankhen
abhi na shaam hui hai na yaad aaya vo
rakha dil is ne bharam kuchh to vahshaton ka tiri
jab us ko paas bulaya to paas aaya vo
nahin thi sahl mire saath zindagi lekin
kabhi na harf-e-shikayat zaban pe laaya vo
mizaj us ka bata.en kisi ko kya ‘ḳhavar’
kahin pe dhuup laga hai kahin pe saaya vo
Leave a Reply