Saleem Betab
kal talak qaane raha jo gardish-e-taqdir par
musta.id hai aaj vo afaq ki tasḳhir pur
shor-o-ghul men shahar ke us ki sada bhi kho ga.i
naaz tha jis ko ki apne nutq ki tasir par
jo bhari mahfil ke dil men raushni phaila ga.i
vo ḳhafa hai aaj tak meri isi taqrir par
aur jab vo le saka mujh se na koi intiqam
Daal di ik ḳhaak ki muTThi miri tasvir par
apne hi jazbat ke aage na kuchh us ki chale
vo jo qadir hai ḳhalaon ki kaThin tasḳhir par
kyuun na duun main dusron ko ratjage ka mashvara
main ki ḳhud nadim huun apne ḳhvab ki ta.abir par
jab se likha hai qasida main ne us ki shaan men
rashk sa aane laga us ko miri tahrir par
aḳhirash vo zinat-e-aghosh-e-gum-nami hua
vo jo ḳhush hota tha apni khokhli tash.hir par
kis tarah ‘betab’ us ne chhu liye barbat ke taar
haath jo rakha hua tha qabza-e-shamshir par
Leave a Reply