Fahmi Badayuni
vafa-dari ghanimat ho ga.i kya
mohabbat bhi muravvat ho ga.i kya
adalat farsh-e-maqtal dho rahi hai
usulon ki shahadat ho ga.i kya
zara iman-dari se batao
hamen tum se mohabbat ho ga.i kya
farishton jaisi surat kyuun bana li
koi ham se shararat ho ga.i kya
kitabat rokne ka kya sabab hai
kahani ki isha.at ho ga.i kya
mazar-e-pir se avaz aa.i
faqiri badshahat ho ga.i kya
ghaTa.en puchhne ko aa rahi hain
hamari chhat ki halat ho ga.i kya
ye kaisa jashn hai us ki gali men
koi bandish ijazat ho ga.i kya
Leave a Reply