baghban par zor chalta hai na kuchh sayyad par
saḳhtiyan karta huun main apne dil-e-nashad par
un ka ro dena mazar-e-kushta-e-bedad par
abr-e-naisan ki hai barish gulshan-e-barbad par
vo bhi hain afsurda marg-e-ashiq-e-nashad par
kahne vaala kaun hai ab marhaba bedad par
kis giraftar-e-qafas ki ah-e-atish-bar se
bijliyan girne lagi hain ḳhana-e-sayyad par
un se kya zikr-e-talatum-ḳhezi-e-dariya-e-ishq
jo tule baiThe hon naseh harche bada-bad par
ya ḳhayal-e-abru-e-ḳhuban se dil ko baaz rakh
ya rag-e-gardan ko rakh de ḳhanjar-e-faulad par
ishq-e-sadiq ko gavara kyuun hua kyun-kar hua
hila-e-parvez ghalib taisha-e-farhad par
ba.ad murdan ruuh tere ḳhanaman-barbad ki
hogi avara faza-e-nik.hat-e-barbad par
halqa-e-dam-e-ala.eq band-e-mazhab qaid-e-nang
kis qadar pabandiyan hain fitrat-e-azad par
is qadar baḌhte ga.e qisse ki daftar ho ga.e
hashiye chaḌhte ga.e ai dil tiri rudad par
nala-kash ho gar tira gham-dida-e-hijran-nasib
fitna-e-shor-e-qayamat chaunk uThe fariyad par
is men ai me.amar-e-hasti maslahat thi kaun si
aisa qasr-e-ḳhushnuma aur ret ki buniyad par
yaad jis ki dil ka mere haal kar deti hai ghair
dil mujhe majbur karta hai usi ki yaad par
dafn hai hindostan ki is men tahzib-e-qadim
phuul barsa ai saba ḳhak-e-jahan-abad par
dil hai be-zauq-e-ghazal ‘mahrum’ lekin chand sher
likh diye hain hazrat-e-‘arman’ ke irshad par
Leave a Reply