tiir jab apni kamanon se nikal jaate hain
kuchh parinde bhi uḌanon se nikal jaate hain
jaane kis raah pe kuchh bhuuk se sahme bachche
raat ko apne makanon se nikal jaate hain
zarf ki baat na kar phuuT paḌen to laave
ḳhud pahaḌon ke dahanon se nikal jaate hain
ham bhi kya log hain ik ghar ko banane ke liye
kis qadar duur gharanon se nikal jaate hain
zabt miT jaa.e to alfaz baghavat ban kar
kitni ḳhamosh zabanon se nikal jaate hain
vo to hote hain faqat vaqt-guzari ke liye
log jo yaad ke ḳhanon se nikal jaate hain
kitne nadan hain jo log nazar se gir kar
dil ke mahfuz ḳhazanon se nikal jaate hain
Leave a Reply