Bismil Azimabadi
sarfaroshi ki tamanna ab hamare dil men hai
dekhna hai zor kitna bazu-e-qatil men hai
ai shahid-e-mulk-o-millat main tire uupar nisar
le tiri himmat ka charcha ghair ki mahfil men hai
vaa.e qismat paanv ki ai zo.af kuchh chalti nahin
karvan apna abhi tak pahli hi manzil men hai
rahrav-e-rah-e-mohabbat rah na jaana raah men
lazzat-e-sahra-navardi duri-e-manzil men hai
shauq se rah-e-mohabbat ki musibat jhel le
ik ḳhushi ka raaz pinhan jada-e-manzil men hai
aaj phir maqtal men qatil kah raha hai baar baar
aa.en vo shauq-e-shahadat jin ke jin ke dil men hai
marne vaalo aao ab gardan kaTao shauq se
ye ghanimat vaqt hai ḳhanjar kaf-e-qatil men hai
mane-e-iz.har tum ko hai haya, ham ko adab
kuchh tumhare dil ke andar kuchh hamare dil men hai
mai-kada sunsan ḳhum ulTe paḌe hain jaam chuur
sar-nigun baiTha hai saaqi jo tiri mahfil men hai
vaqt aane de dikha denge tujhe ai asman
ham abhi se kyuun bata.en kya hamare dil men hai
ab na agle valvale hain aur na vo arman ki bhiiḌ
sirf miT jaane ki ik hasrat dil-e-‘bismil’ men hai
Leave a Reply