har naya moḌ hai jaada miri manzil to nahin
jo tamanna hai mire dil men vo hasil to nahin
kis liye aap ko andesha-e-rusva.i hai
darmiyan aap ke mere koi haa.il to nahin
meri barbadi ka ehsas tujhe kaise hua
tere pahlu men mira TuuTa hua dil to nahin
kis liye aap ko ye shauq-e-ḳhud-ara.i hai
aa.ina samne hai koi muqabil to nahin
aap kyon itne pareshan nazar aate hain
apni mahfil hai kisi aur ki mahfil to nahin
ye vahi kahte hain malum nahin jin ko ‘raza’
ishq karna bahut asan hai mushkil to nahin
Leave a Reply