Shaheen Abbas
bante bante apne pech-o-ḳham bane
tu bana phir main bana phir ham bane
ek aansu tha gira aur chal paḌa
ek aalam tha so do aalam bane
ik qadam uTTha kahin pahla qadam
ḳhaak uḌi aur apne saare gham bane
apni avazon ko chup rah kar suna
tab kahin ja kar ye zer-o-bam bane
aankh banne men bahut din lag ga.e
dekhiye kab aankh andar nam bane
zaḳhm ko be-rah-ravi men rah mili
ḳhuun ke chhinTe uḌe aalam bane
ham kahan the us samay us vaqt jab
tere andar ke ye sab mausam bane
Leave a Reply