ye akhiri saaat shaam ki hai
ye shaam jo hai mahjuri ki
ye shaam apnon se duuri ki
is shaam ufuq ke honton par
jo laali hai zahrili hai
is shaam ne meri ankhon se
sahba-e-tarab sab pi li hai
ye shaam ghazab tanhai ki
patjhad ki hava barfili hai
is shaam ki rangat piili hai
is shaam faqat avaz tiri
kuchh aise sunai deti hai
avaz dikhai deti hai
ye akhiri saaat shaam ki hai
ye shaam bhi tere naam ki hai
Leave a Reply