khanuman-soz ma-siva huun main
apne saae se bhi juda huun main
ghaur har chand kar raha huun main
par ye khulta nahin ki kya huun main
nahin is rah men dusre ki khapat
aap hi apna rahnuma huun main
vo agar aa milen to kya hai ajab
gham se kuchh aur ho gaya huun main
dil hai shauq-e-gunah se labrez
dekhne hi ka parsa huun main
kyuun na ho daar ka vo mustaujib
jo ki banda kahe khuda huun main
soz-e-dil kar chuka hai jism ko khaak
ab tira muntazir saba huun main
har lab-e-zakhm-e-tan se main dam-e-qatl
kahta qatil ko marhaba huun main
un sa maghrur aur pursish-e-hal
khvab hai ye jo dekhta huun main
mujh sa hoga na sakht-jan koi
ki shab-e-hijr men jiya huun main
meri pursish jo ki kisi ne to vo
bole haan surat-ashna huun main
shareh-e-hal-e-dil samajh mujh ko
dard hi dard ho gaya huun main
aankh tak dalta nahin gahak
kuchh ajab jins-e-na-rava huun main
roz-o-shab hai khayal-e-kakul-o-zulf
kin balaon men phans raha huun main
misl-e-nashtar hain khar-e-sahrai
aur vahshat barhana-pa huun main
kal jo main ne kaha ki o be-mehr
dard-e-furqat se mar raha huun main
hans ke bole ye sab banavat hai
aap ko khuub janta huun main
dikhne kya zakhm-e-dil lage ‘majruh’
haae haae jo kar raha huun main
Leave a Reply