farq koi nahin magar hai bhii!
talḳh donon hain zahr bhi mai bhi
shor itna hai jis ke hone ka
kaun jaane ki vo kahin hai bhi
sina-e-admi ki baat hai aur
yuun to chhalni hai sina-e-nai bhi
yuun bhi chup huun tire badalne par
pahle jaisi nahin koi shai bhi
mere baare men sochne vaale
mere baare men kuchh karen tai bhi
de rahe hain vahi mujhe dushnam
bolni hai jinhen miri jai bhi
sur badalne ka tha mahal ‘rashid’
tum ne badli nahin magar lai bhi
Leave a Reply