Poet
vaqt-e-aḳhir hamen didar dikhaya na gaya
ham to duniya se ga.e aap se aaya na gaya
raz-poshi se kabhi haath uThaya na gaya
nabz dikhla.e maraz apna bataya na gaya
phuuT nikli na ruki siine ki andar ḳhushbu
mushk tha dagh-e-mohabbat ki chhupaya na gaya
mera dil kis ne liya naam bata.un kis ka
main huun ya aap hain ghar men koi aaya na gaya
haath uTha baiThe ham is zindagi-e-shirin se
gham juda.i ka ye tha talḳh ki khaya na gaya
jab kiya qasd ki ehsan kisi ka luun main
aabru ghaTne lagi haath baḌhaya na gaya
aaj vo haal hai apna jo kisi ne puchha
ho ga.e qufl-e-dahan-sharm bataya na gaya
ranj puchha jo mohabbat men to rahat samjhe
dukh uThaya kabhi dil us se uThaya na gaya
kuchh na puchho lab-e-shirin ki halavat ham se
ye vo halva hai kabhi baanT ke khaya na gaya
haif ankhon ne bhi dekhi na miri tishna-labi
munh men paani mizha-e-tursi chuvaya na gaya
na-tavani ka bura ho ham udhar ko jo chale
tivr aa aa ga.e gir gir paḌe jaaya na gaya
maghz chaTa kabhi andoz-o-nasihat vaale
gham hamara kisi gham-ḳhvar se khaya na gaya
dost kab dost ka hota hai muḳhill-e-rahat
so ga.e paanv to hathon se jagaya na gaya
kab harara dil-e-betab ka rone se miTa
sho.ala-e-barq kabhi munh se bujhaya na gaya
amad-e-yar ki kya kya na suni garm ḳhabar
umr-bhar rasta dekha koi aaya na gaya
jis ke juuya hue ham DhunDh nikala us ko
aql gham hai ki mizaj aap ka paaya na gaya
us ke kuche se za.ifi men bhi uTThe na qadam
sar pe dhuup aa ga.i divar ka saaya na gaya
qat.a jab se hui ummid-e-visal-e-janan
is tarah baiTh gaya dil ki uThaya na gaya
jagna hi miri taqdir men kya likkha tha
shab-e-furqat men ajal se bhi sulaya na gaya
qasd tha ‘bahr’ ka but-ḳhane se ka.abe ki taraf
la-ubali hai ḳhuda jaane gaya ya na gaya
Leave a Reply