Hafeez Jaunpuri
munh mira ek ek takta tha
us ki mahfil men main tamasha tha
ham jo tujh se phiren ḳhuda se phiren
yaad hai kuchh ye qaul kis ka tha
vasl men bhi raha firaq ka gham
shaam hi se sahar ka khaTka tha
apni ankhon ka kuchh qusur nahin
husn hi dil-fareb is ka tha
fatiha paḌh rahe the vo jab tak
meri turbat par ek mela tha
nama-bar naama jab diya tu ne
kuchh zabani bhi us ne puchha tha
ab kuchh is ka bhi e.atibar nahin
pahle dil par baḌa bharosa tha
vo jo ruk ruk ke puchhte the haal
dil men rah rah ke dard uThta tha
juTha va.ada bhi ai ‘hafiz’ un ka
zindagi ka miri sahara tha
Leave a Reply