shauq uryan hai bahut jin ke shabistanon men
vo mile ham ko hijabon ke sanam-ḳhanon men
khiḌkiyan kholo ki dar aa.e koi mauj-e-hava
raakh ka Dher hain kuchh log tarab-ḳhanon men
shahr-e-ḳhurshid ke logon ko ḳhabar do koi
din ke gham Duub ga.e raat ke paimanon men
jab koi sa.at-e-shadab mili jam-ba-kaf
jaan si paḌ ga.i bujhte hue armanon men
ai saba le ke chali aa kisi badal ki phuvar
ḳhaak uḌti hai bahut dil ke bayabanon men
ai ghazalan-e-vatan naaz karo ham pe ki ham
aḳhiri pusht hain ḳhuban ke sana-ḳhvanon men
Leave a Reply