gul hain to aap apni hi ḳhushbu men sochiye
jo kuchh bhi sochna hai vo urdu men sochiye
dil men agar nahin hai kisi zaḳhm ki numud
surḳhi kahan se aa ga.i aansu men sochiye
ye mas.ala nahin ki jalenge kahan charagh
kaise hava.en a.engi qaabu men sochiye
yuun sarsari guzariye na us dasht-e-karb se
vahshat ki iztirab hai aahu men sochiye
kuchh to ḳhabar nikaliye kaise laga ye rog
kyuun Dhal raha hai aadmi vastu men sochiye
ki aap ne jo pursish-e-ahval shukriya
ham kaise honge saltanat-e-hu men sochiye
ḳhud puchhti hai aap se tanha.i aap ki
mahtab kyuun hai raat ke pahlu men sochiye
vo jis ka qurb aap ko milna muhal ho
kya ho jo baiTh jaa.e vo baazu men sochiye
Leave a Reply