apne pahlu se vo ghairon ko utha hi na sake
un ko ham qissa-e-gham apna suna hi na sake
zehan mera vo qayamat ki do-alam pe muhit
aap aaise ki mire zehan men aa hi na sake
dekh lete jo unhen to mujhe rakhte maazur
shaikh-sahib magar us bazm men ja hi na sake
aql mahngi hai bahut ishq khilaf-e-tahzib
dil ko is ahd men ham kaam men la hi na sake
ham to khud chahte the chain se baithen koi dam
aap ki yaad magar dil se bhula hi na sake
ishq kamil hai usi ka ki patangon ki tarah
taab nazzara-e-maasuq ki la hi na sake
dam-e-hasti ki bhi tarkib ajab rakkhi hai
jo phanse us men vo phir jaan bacha hi na sake
mazhar-e-jalva-e-janan hai har ik shai ‘akbar’
be-adab aankh kisi samt utha hi na sake
aisi mantiq se to divangi behtar ‘akbar’
ki jo khaliq ki taraf dil ko jhuka hi na sake
Leave a Reply