Aata Hun Jab Us Gali Se Sau Sau Khwari Khinch Kar

aata huun jab us gali se sau sau khvari khinch kar

phir vahin le jaae mujh ko be-qarari khinch kar

pahuncha hai ab to nihayat ko hamara hal-e-zar

la use jis-tis tarah tasir-e-zari khinch kar

koh-e-gham rakhti hai dil par is khiram-e-naz se

khajlat-e-raftar-e-kabk-e-kohsari khinch kar

kis ke shor-e-ishq se yuun rota rahta hai sada

naala o fariyad ye abr-e-bahari khinch kar

bandhun huun varastagi ka dil men apne jab khayal

bandh le jaaen hamen zulfen tumhari khinch kar

kal jo tu ghar se na nikla uth gaya kar ke dua

subh se ta-sham main kya intizari khinch kar

galiyan de maar le ya qatl kar mukhtar hai

laai ab to yaan mujhe be-ikhtiyari khinch kar

saqiya paiham pila de mujh ko mala-mal jaam

aaya huun yaan main azab-e-hoshyari khinch kar

‘hasrat’ us ki bazm ke jaane se rakh mujh ko muaaf

muft men roega vaan se sharmsari khinch kar

Leave a Comment