vaqar-e-shah-e-zavil-iqtadar dekh chuke
zuhur-e-qudrat-e-parvardigar dekh chuke
naqab khol ke ru-e-nigar dekh chuke
kuchh ek baar nahin laakh baar dekh chuke
jahan ke aish-o-gham-e-rozgar dekh chuke
jo dekhta tha so parvardigar dekh chuke
vo jite-ji hue iiza se naza.a ki agah
jo sadme tere shab-e-intizar dekh chuke
ḳhuda ke vaste ab chhoḌ jism-e-ḳhaki ko
aziyyaten bahut o jan-e-zar dekh chuke
junun ne ḳhuub dikha.i bahar-e-jeb-o-kanar
hava men uḌte hue taar taar dekh chuke
vo qaul ghair ko dete hain lete hain iqrar
tiri taraf ko dil-e-be-qarar dekh chuke
yaqin hai ab na karen mere qatl men taḳhir
fasan chaTa ke vo ḳhanjar ki dhaar dekh chuke
na Daal pech men ḳhatir na ab pareshan kar
bahut se dard-e-sar o zulf-e-yar dekh chuke
kare vo zinat-e-fitrak ya halal kare
kahin idhar ko bhi vo shahsavar dekh chuke
na pahuncha ek bhi zarra tumhare daman tak
uḌa ke ḳhaak bhi ham ḳhaksar dekh chuke
hue safed-o-siyah-e-jahan se vaqif
bahut si gardish-e-lail-o-nahar dekh chuke
kiye hain ḳhuub se nazzare bagh-e-hasti ke
jahan ko bas mire parvardigar dekh chuke
ilahi tu ne sharaf jis ko asman pe diya
vo sar-zamin bhi ye ḳhaksar dekh chuke
nahin hai ek men himmat ye vo zamana hai
gharib dekh chuke mal-dar dekh chuke
tahi hai nashsha-e-ulfat se ye ḳhum-e-gardun
sharaben pi ke tire bada-ḳhvar dekh chuke
kulah-e-kaj ko haTa kar dikha diya abru
qasam ali ki khinchi zul-fiqar dekh chuke
bhala vo ḳhaak karen qasd bazm-e-hasti ka
jo log rahat-e-kunj-mazar dekh chuke
hua yaqin farishton ko ḳhaksari ka
kafan likha jo ye ḳhatt-e-ghubar dekh chuke
amame-baz jo ye kanThe ghaTTe vaale hain
jahan men jaise hain zi-e’tibar dekh chuke
aTha.i-gire hain sab ja.al-saz hain mufsid
kuchh ek do nahin ham to hazar dekh chuke
siva.e zat-e-ḳhuda sab ke vaste hai fana
sabat-e-hasti-e-na-pa.edar dekh chuke
qusur-e-baḳht hai phir jaa.en ab agar mahrum
dar-e-karim to ummid-var dekh chuke
hazar-shukr ki baaqi nahin koi hasrat
bahar teri bhi o gul-ezar dekh chuke
najaf ko le ga.e mayyat farishta-e-naqqal
aziiz khol ke mera mazar dekh chuke
faqir bhi mutarassid nigah-e-lutf ka hai
idhar bhi ‘rind’ mira shahryar dekh chuke
Leave a Reply