Shakeela Bano
shokh masum si allhad vo kunvari baten
yaad aati hain mujhe aap ki pyari baten
naaz se ruthna phir un ka manana mujh ko
yaad aane lagin rah rah ke vo saari baten
astin apne hi ashkon se bhigo daloge
yaad aengi tumhen jab bhi hamari baten
ki khata tum ne ki ham ne use kal sochenge
aaj ki raat to ye chhodiye saari baten
aaj ke daur men har roz hi sunna hongi
be-hisi se bhari mafhum se aari baten
un ko bhati nahin ye baat alag hai ‘bano’
dil men rakh lene ke qabil hain tumhari baten
Leave a Reply