Aks-dar-Aks

Nahid Qasmi

na chand-matha na tara-thodi

na jhil-ankhen, na phul-lab hain

na aanch azm-o-yaqin ki dil men

nuqush-e-rukh itne mit gae hain, nuqush kab hain

ai aine vaqt ke! tujhe ek baar bhi

ik hasin chehra na de sake ham

magar hain ham ab bhi aks tera

vo aks hi to hamara sach hai

hamari ankhen bujhi hui hain magar yahi to hain teri ankhen

hamare chehre sute hue hain, magar yahi to hai tera chehra

hamare aansu hain tere ansu, hamare dukh saare tere dukh hain

ki tu bhi sach bolne ka aadi hai, ham bhi aadi

ham apne chehre, ham apne batin sanvar lenge

hamari ankhon men dekh apne hasin farda ka ik hayula

ki chand matha hai, taara thodi hai, jhiil ankhen hain, phuul lab hain

hasin hain ham, hasin hai tu hasin sab hain