Poet
kaun kahta hai ki mahrum-e-karam hain ham log
lutf-andoz-e-jafa mahv-e-sitam hain ham log
zulf suljhi hai to ik husn nikhar aaya hai
is taraf dekh ki a.ina-e-gham hain ham log
koi ḳhatir men na laa.e to na laa.e lekin
shayad is daur-e-mohabbat men aham hain ham log
la.eq-e-lutf-o-inayat nahin ham ahl-e-vafa
kya kaha ye ki saza-var-e-sitam hain ham log
kam nahin tera taghaful bhi jafa ho ki na ho
is men kya shak hai ki mamnun-e-karam hain ham log
ahl-e-ka.aba ko shikayat hai to beja bhi nahin
ki haqiqat men parastar-e-sanam hain ham log
fasla kuchh bhi nahin hai magar idrak kahan
aap se duur to do-char qadam hain ham log
aap allama-o-fankar hain ‘nudrat’ lekin
ye to farma.iye kis baat men kam hain ham log
Leave a Reply