ajnabi musafir ko rasta dikha.ega
kaun apni chaukhaT par ab diya jala.ega
jitni ne.amaten hongi ḳhuub DaT ke kha.ega
phir hamen qana.at ka vo sabaq paḌha.ega
pahle aane vaale hi luuT le ga.e sab maal
ba.ad men jo aa.ega ḳhali haath ja.ega
peT hai agar ḳhali phir kahan ki ḳhuddari
bhuuk jab sata.egi ḳhud ko bech kha.ega
sab ki apni rahen hain sab ki apni samten hain
kaun aise aalam men karvan banega
jis ki umr guzri ho reshmi shabistan men
kya vo hanpte din ki dastan suna.ega
aa.ina sifat logo yuun raho na parde men
varna kaun duniya ko aa.ina dikha.ega
ham jo mil ke aapas men raushni luTa.enge
main bhi jagmaga.unga tu bhi jagmaga.ega
phir vo dega ḳhush-ḳhabari ham ko paar utarne ki
phir nadi men kaghaz ki naav vo baha.ega
meri jaḌ bhi kaTega vaqt par pas-e-parda
vo miri himayat men haath bhi uTha.ega
mahfilen faqiron ki boriye pe sajti hain
bargah-e-shahi ko kaun munh laga.ega
afsaron ke ḳhadim sab juT ga.e safa.i men
‘mahir’ apni basti men aaj kaun aa.ega
Leave a Reply