Swapnil Tiwari
niind se aa kar baiTha hai
ḳhvab mire ghar baiTha hai
aks mira a.ine men
le kar patthar baiTha hai
palken jhuki hain sahra ki
jis pe samundar baiTha hai
ek bagula yadon ka
kha kar chakkar baiTha hai
us ki nindon par ik ḳhvab
titli ban kar baiTha hai
raat ki Table book kar ke
chand dinner par baiTha hai
andhiyara ḳhamoshi ki
oḌh ke chadar baiTha hai
‘atish’ dhuup ga.i kab ki
ghar men kyunkar baiTha hai
Leave a Reply