Hasnain Aqib
dukh dard gham hain teri inayat zindagi
tu ne nibha.in ḳhuub rivayat zindagi
ik tu niyaz-mand sarapa main be-niyaz
milte nahin hain apne ḳhayalat zindagi
fitrat men aadmi ke taghayyur nahin magar
insan ko badalte hain halat zindagi
milte rahe hain saare zamane se umr bhar
tujh se na jaane kab ho mulaqat zindagi
donon ke biich koi ta.alluq nahin hai ḳhaas
jiina hai aur chiiz alag baat zindagi
aram se guzarti kuchh din hayat ke
sunti kabhi jo tu bhi miri baat zindagi
hai musta.ar tar-e-nafas se tira vajud
is se ziyada kya tiri auqat zindagi
sanson ke vaste kare dast-e-talab daraz
har roz mujh se mange hai ḳhairat zindagi
auron ke vaste hai mujassam takallufat
‘aqib’ tire liye hai ḳhurafat zindagi
Leave a Reply