kis se darte ho ki sab log tumhari hi tarah
ek se hain vahi ankhen vahi chehre vahi dil
kis pe shak karte ho jitne bhi musafir hain yahan
ek hi sab ka qabila vahi paikar vahi gil
ham to vo the ki mohabbat tha vatira jin ka
pyaar se milta to dushman ke bhi ho jaate the
is tavaqqoa pe ki shayad koi mehman aa jaae
ghar ke darvaze khule chhod ke so jaate the
ham to aae the ki dekhenge tumhare qarye
vo dar-o-bam ki tarikh ke surat-gar hain
vo arine vo masajid vo kalisa vo mahal
aur vo log jo har naqsh se afzal-tar hain
rome ke but hon ki paris ki ho monalisa
keats ki qabr ho ya turbat-e-firdausi ho
qartaba ho ki ajanta ki mohanjodado
dida-e-shauq na mahrum-e-nazar-bosi ho
kis ne duniya ko bhi daulat ki tarah banta hai
kis ne taqsim kiye hain ye asase saare
kis ne divar tafavut ki uthai logo
kyuun samundar ke kinare pe hain pyase saare
Leave a Reply