le lunga jaan de ke mohabbat jahan mile
kuchh din men shayad aur ye sauda garan mile
ai karvan-e-ishq-o-vafa ke musafiro
kahna mira salam bhi manzil jahan mile
hamvar kar mizaj bahar-o-khizan se dil
mumkin nahin mizaj-e-bahar-o-khizan mile
ye manzilat bhi hissa-e-dushman men aae kyuun
ham sar na phod len jo tira astan mile
pahle hi se dilon ke na milne ka dhang tha
jis mod par mile hain vo daman-kashan mile
main ne kiya hai ek hi unvan se khitab
kis kis ke ruup men na mire mehrban mile
kyuun jaae ‘najm’ aisi faza chhod kar kahin
rahne ko jis ke gulshan-e-hindostan mile
Leave a Reply