Misl-E-Baad-E-Saba Tere Kuche Mein Ai Jaan-E-Jaan Aae Hain

Athar Nafees

misl-e-bad-e-saba tere kuche men ai jan-e-jan aa.e hain

chand saa.at rahenge chale ja.enge sar-garan aa.e hain

sham-e-azurdagi ke sata.e hue choT khaa.e hue

mehrban ho ke mil ham bahut aaj na-shadman aa.e hain

ishq karna jo sikha to duniya baratne ka fan aa gaya

karobar-e-junun aa gaya hai to kar-e-jahan aa.e hain

zaḳhm khulne lage phir ubharne lagin dil ki mahrumiyan

yaad phir tere andaz-e-dildari-e-jism-o-jan aa.e hain

dastan-e-shab-e-hijr un ko sunane ka din ye nahin

mahfil-e-ishq men aaj hi to vo kuchh mehrban aa.e hain