dil hai to tire vasl ke arman bahut hain
ye ghar jo salamat hai to mehman bahut hai
main daad ka ḳhvahan nahin ai davar-e-mahshar
aaj apne kiye par vo pasheman bahut hain
dil le ke khilaune ki tarah toḌ na Dalen
Dar mujh ko yahi hai ki vo nadan bahut hain
vo phuul chaḌhate hain dabi jaati hai turbat
ma.ashuq ke thoḌe se bhi ehsan bahut hain
tum ko na pasand aa.e na lo pher do mujh ko
is dil ke ḳharidar miri jaan bahut hain
DanTa kabhi ghamze ne kabhi naaz ne Toka
ḳhalvat men bhi saath un ke nigahban bahut hain
ḳhali bhi koi dil hai vahan ishq-e-sanam se
kahne ko to ka.abe men musalman bahut hain
shayad ye asar ho meri ah-e-sahari ka
kuchh sub.h se vo aaj pareshan bahut hain
kya shab ko ‘hafiz’ un se yahin vasl ki Thahri
aaj aap ke ghar aish ke saman bahut hain
Leave a Reply