Jin Se uThta Nahin Kali Ka Bojh

jin se uThta nahin kali ka bojh

un ke kandhon pe zindagi ka bojh

vaqt jab haath men nahin rahta

kis liye haath par ghaḌi ka bojh

byaah ke vaqt ki koi photo

gahnon ke bojh par hansi ka bojh

sar pe yadon ki Tokari rakh li

kam na hone diya kami ka bojh

minnaten kyon kare ḳhuda se ab

aadmi banTe aadmi ka bojh

zabt ka bandh TuuT jaane do

kam karo aankh se nami ka bojh

hijr tha ek hi ghaḌi ka par

dil se utra na us ghaḌi ka bojh

ham ko aise ḳhuda qubul nahin

jin se uThta nahin ḳhudi ka bojh