aḳhir tumhare ishq men barbad ho sake
guzre kahan kahan se to shahzad ho sake
basti ko apni chhoḌ ke aaya hai ik faqir
ḳhvahish ki tere jism men abad ho sake
muddat se apni yaad bhi aati nahin hamen
tum jis ko yaad ho use kya yaad ho sake
honTon pe honT rakh de ki main raakh ho sakun
meri na.e sire se phir ijad ho sake
par phaḌphaḌa raha hai parinda badan men qaid
is pinjre ko khol ki azad ho sake
fahrist le ke aa.e hain ashiq tire sabhi
ai kaash mere naam pe hi saad ho sake
Leave a Reply