aaKHir Tumhaare Ishq Mein Barbaad Ho Sake

āḳhir tumhāre ishq meñ barbād ho sake

guzre kahāñ kahāñ se to shahzād ho sake

bastī ko apnī chhoḌ ke aayā hai ik faqīr

ḳhvāhish ki tere jism meñ ābād ho sake

muddat se apnī yaad bhī aatī nahīñ hameñ

tum jis ko yaad ho use kyā yaad ho sake

hoñToñ pe hoñT rakh de ki maiñ raakh ho sakūñ

merī na.e sire se phir ījād ho sake

par phaḌphaḌā rahā hai parinda badan meñ qaid

is pinjre ko khol ki āzād ho sake

fahrist le ke aa.e haiñ āshiq tire sabhī

ai kaash mere naam pe hī saad ho sake

Leave a Comment