Seema Naqvi
surḳh sunahri sabz aur dhani hoti hai
jhiil kinare shaam suhani hoti hai
ḳhud se jab bhi aankh milani hoti hai
aankh to jaise paani paani hoti hai
raqs kare aur aankh men paani bhar aa.e
har laḌki thoḌi divani hoti hai
kitni bojhal hai ḳhiffat ki gaThri bhi
jo mujh ko har roz uThani hoti hai
vo kab bina bata.e va.ada toḌ gaya
ankhon se bhi ana-kani hoti hai
naani ke chehre ki lakiron ko bunti
bachpan ki har shaam kahani hoti hai
kaise kah duun mujhe mohabbat hai tum se
tum se to har baat chhupani hoti hai
dil ke darvaze par aahaT sunti huun
jabhi to ankhon men hairani hoti hai
bhige bhige honT jahan huun shabnam ke
vahin kahin par raat ki raani hoti hai
roz nigahen sach kah deti hain saara
roz mujhe hi baat banani hoti hai
tum se mil kar ‘sima’-naqvi ḳhud apne
hone ki bhi yad-dahani hoti hai
Leave a Reply