fasl-e-junun men daman-o-dil chaak bhi nahin
kya dasht hai ki uḌti kahin ḳhaak bhi nahin
jiina tira muhal to hona hi tha ki tu
is daur ke hisab se chalak bhi nahin
raqs-e-junun to ḳhair baḌi baat hai magar
ab shahar men numa.ish-e-idrak bhi nahin
achchha hua ki jald hi tu ne utaar di
jachti hai sab pe dard ki poshak bhi nahin
dariya kuja ki tishna-labon ke liye to ab
raste men koi dida-e-namnak bhi nahin
vo din bhi the ki aankh bichhate the barg-o-gul
ab mujh pe multafit ḳhas-o-ḳhashak bhi nahin
dhul jaa.en jis ke lams se dil ki kasafaten
banhon men vo tira badan-e-pak bhi nahin
kyuun sogvar ab bhi hai marg-e-zamir par
vo vaqi.a tha utna alamnak bhi nahin
ik umr se kinara-e-be-charagi pe huun
dariya chaḌha hai aur main tairak bhi nahin
kyuun ḳhushk ho gaya shajr-e-arzu ‘salim’
mausam tha jabki ziist ka saffak bhi nahin
Leave a Reply