us ada se bhi huun main ashna tujhe itna jis pe ghurur hai
main jiyunga tere baghair bhi mujhe zindagi ka shu.ur hai
na havas mujhe mai-e-nab ki na talab saba-o-sahab ki
tiri chashm-e-naz ki ḳhair ho mujhe be-piye hi surur hai
jo samajh liya tujhe ba-vafa to phir is men teri bhi kya ḳhata
ye ḳhalal hai mere dimagh ka ye miri nazar ka qusur hai
koi baat dil men vo Thaan ke na ulajh paḌe tiri shaan se
vo niyaz-mand jo sar-ba-ḳham ka.i din se tere huzur hai
mujhe dengi ḳhaak tasalliyan tiri jan-gudaz tajalliyan
main saval-e-shauq-e-visal huun to jalal-e-sho.ala-e-tur hai
main nikal ke bhi tire daam se na girunga apne maqam se
main ‘qatil’-e-tegh-e-jafa sahi mujhe tujh se ishq zarur hai
Leave a Reply