sukun-e-dil gaya nazron se sab qatare ga.e
chaman men khilte hue jab se phuul maare ga.e
hava-e-maut zara der kya idhar aa.i
ki mere haath se uḌ kar mire ghubare ga.e
ye kaisi karbala barpa hui peshawar men
lahu men Duube hue mere bachche maare ga.e
unhen hi martaba milta hai ja ke jannat men
husul-e-ilm ki ḳhatir jo jaan vaare ga.e
chaman ujaḌne vaalo tumhen ḳhuda samjhe
tumhen na aa.i haya phuul to hamare ga.e
rahega yaad hamen aane vaali naslon tak
vo naqsh-e-pa jo yahan ḳhuun se ubhare ga.e
salam mera ‘azim’ un shahid bachchon ko
jo apni jiit ki ḳhatir bhi jaan haare ga.e
Leave a Reply