Zaheer Kashmiri
hain bazm-e-gul men bapa nauha-ḳhvaniyan kya kya
bahar chhoḌ ga.i hai nishaniyan kya kya
tamam umr gul-o-mul ke darmiyan guzri
tamam umr rahin sar-giraniyan kya kya
vo shaḳhs-e-itr-badan jab bhi samne aaya
dil-o-nazar pe huiin gul-o-fashaniyan kya kya
ḳhabar na thi yahi vaj.h-e-sukun-e-jan hogi
nigah-e-yar se thiin bad-gumaniyan kya kya
Tapak ke aankh se tufan uTha diye jis ne
is ek ashk men thiin be-karaniyan kya kya
huzur-e-yar se jab izn-e-guftugu na mila
suḳhan-taraz huiin be-zabaniyan kya kya
har ek dard ko darman bana diya us ne
jafa ke bhes men thiin mehrbaniyan kya kya
vo husn aaj bhi hila-gari men yakta hai
dil-e-gharib sunega kahaniyan kya kya
us ik jamal-e-gurezan ki justuju men ‘zahir’
ḳharab-o-ḳhvar hui hain javaniyan kya kya
Leave a Reply