Syed Aabid Ali Aabid
ham bin gham-e-yar bhi jiye hain
marne ke baḌe jatan kiye hain
maḳhfi tujh se bhi hain gham-e-yar
kuchh vaar jo dil ne sah liye hain
dil se bhi chhupa ke ham ne rakkhe
kuchh chaak jo umr bhar siye hain
kuchh ḳhun-e-vafa se kuchh hina se
kya rang bahar ne liye hain
afsos hamari saḳht-jani
ahbab ne bhi gile kiye hain
gulshan men ajab hava chali hai
phulon ne honT si liye hain
dil-baḳhtagi o sher-ḳhvani
do kaam to umr bhar kiye hain
kahte the tujhi ko jaan apni
aur tere baghair bhi jiye hain
Leave a Reply