Kaleem Aajiz
siine ke zaḳhm paanv ke chhale kahan ga.e
ai husn tere chahne vaale kahan ga.e
shanon ko chhin chhin ke phenka gaya kahan
a.ine toḌ-phoḌ ke Daale kahan ga.e
ḳhalvat men raushni hai na mahfil men raushni
ahl-e-vafa charagh-e-vafa le kahan ga.e
but-ḳhane men bhi Dher hain TukḌe haram men bhi
jam-o-subu kahan the uchhale kahan ga.e
ankhon se ansuon ko mili ḳhaak men jagah
paale kahan ga.e the nikale kahan ga.e
barbad-e-rozgar hamara hi naam hai
aa.en tamasha dekhne vaale kahan ga.e
chhupte ga.e dilon men vo ban kar ghazal ke bol
main DhunDhta raha mire naale kahan ga.e
uThte ho.uun ko sab ne sahara diya ‘kalim’
girte hue gharib sambhale kahan ga.e
Leave a Reply