Sahir Siyalkoti
kabhi sujhi na tark-e-ḳhud-numa.i ki sitaron ko
ḳhuda ne ye sa.adat baḳhsh di ham ḳhaksaron ko
baḌon ki dosti se faiz kya hai ḳhaksaron ko
miTa deta hai dariya josh-e-tufan men kinaron ko
ḳhuda ke fazl se mahshar men bhi vo surḳh-ru honge
janab-e-shaiḳh kya samjhe hue hain bada-ḳhvaron ko
kisi ko ishq ke uqde ka hal ab tak nahin sujha
ye vo mushkil hai duniya men jo pesh aa.i hazaron ko
vahi nisbat hai ḳhuban-e-jahan ko husn se tere
falak par jo mah-e-kamil se hoti hai sitaron ko
hai is afsurdagi par bhi tabi.at men vo rangini
miri fasl-e-ḳhizan par rashk aata hai baharon ko
kisi ke ḳhair-maqdam se kabhi ghafil nahin hote
qadam lena sikhaya main ne har sahra ke ḳharon ko
maqam apna bhi ‘sahir’ imtiyazi shaan rakhta hai
hamari puḳhta-goi ki ḳhabar kya ḳham-karon ko
Leave a Reply