Pandit Daya Shankar Naseem Lakhnavi
band kar rauzan-e-dar chaho ki raḳhna na rahe
taak par dekhe nahin jhankne vaale tum ne
munh ki khaoge miri jaan ḳhuda ḳhair kare
munh laga rakkhe hain jis tarah rizale tum ne
uf karun dil ke jalan se to kaleja phaT jaa.e
bulbulo kaise hazaron kiye naale tum ne
daman-e-ashk na chhoḌunga main ai dida-e-tar
dil kiya mera hasinon ko havale tum ne
dast-o-pa vadi-e-vahshat ki tamanna thi tumhen
aable toḌ chuke ḳhaar nikale tum ne
kab shikast aise sanad hai ki dagha ki ai ḳhaar
haath se phoḌ liye paanv ke chhale tum ne
zulf-e-zanjir-e-junun samjhe bhi ai hazrat-e-dil
kya paḌa pech ki paanv apne nikale tum ne
kis gulistan ki chaman-bandi hai ai mardum-e-chashm
naḳhl-e-mizhgan se bhare ashkon se thale tum ne
bulbulen phulon se nalan hain ki shabnam ke evaz
qatre simab ke kanon men hain Daale tum ne
chashm-o-abru se kisi mast ki be-shak bah ke
mai-kasho taaq pe kyon rakkhe hain pyale tum ne
kahin surat na bandhi naqsh-e-tamanna ki ‘nasim’
saikḌon sim-badan sanche men Dhale tum ne
Leave a Reply