Ghulam Husain Sajid
sar par kisi gharib ke na-char gir paḌe
mumkin hai mere sabr ki divar gir paḌe
kya ḳhuub suraḳh-ru hue ham kar-e-ishq men
do-char kaam aa ga.e do-char gir paḌe
is baar jab ajal se mira samna hua
kashti se ḳhvab haath se patvar gir paḌe
raushan koi charagh nahin naḳhl-e-tur par
sajde men kis ko dekh ke ashjar gir paḌe
karti hai farsh-e-ḳhak ko divar aa.ina
ankhon se jab ye daulat-e-bedar gir paḌe
is paar dekh kar mujhe ik gul-badan ke saath
jitne mire gulab the us paar gir paḌe
‘sajid’ agar aziiz thi apni ana inhen
kya soch kar gali men mire yaar gir paḌe
Leave a Reply